නීරෝගී දිවියකට, නීරෝගී ජීවන රටාවකට මෙම පියවර 10 ඔබට මහඟු රුකුලක් වනු ඇත. මුලින්ම ඔබ කළ යුතු වන්නේ, දවසේ වැඩ කටයුතු සැලැසුම් කිරීමය.
දවසේ ඔබ කිරීමට සූදානම් සියලුම වැඩ සවිස්තරාත්මකව සටහන් කරන්න.
එදින ඔබ කෑමට බලාපොරොත්තු වන්නේ මොනවද සටහන් කරන්න. ප්‍රධාන කෑම වේලවලට අමතරව ඔබ කෑමට බලාපොරොත්තු වන්නේ මොනවාදැයි කල්පනා කර බලන්න. ඒවාද සටහන් කර ගන්න. ඔබේ සැලැස්මට නොගැලපෙන හෝ අහිතකර හෝ ආහාර පාන ගැනීමෙන් වැළැකිය යුතුය. ක්‍රියාවන්ගෙන් ද වැළැකිය යුතුය. එසේ නොකිරීමට ඔබ ඔබටම උපදෙස් දෙන්න.
සෑම දිනකම ඔබ කිරීමට සූදානම් වන සියලු දේ එසේ සැලැසුම් කළ පසු, නින්දෙන් අවදි වූ වේලාවේ සිට යළි රාත්‍රී නින්දට යනතෙක් ඔබ ඔබේ සැලැස්මට අනුව කාර්ය බහුල වනු ඇත.
ඔබේ සිතේ වැඩ කරනු ඇත්තේ ද එම සැලැස්ම පමණි. එවිට, ඔබේ බර ගැන හෝ ඔබේ වෙනත් අසනීප තත්ත්වයන් ගැන හෝ මනසට වදයක් නොවනු ඇත. ඔබ වඩ වඩාත් ක්‍රියාකාරී වනු ඇත. නොකරන දේවල් හෝ කළ දේවල් ගැන යළි සිතමින් පසු තැවෙනවාට වඩා සැලැස්මකට අනුව එදිනෙදා ක්‍රියාකාරකම් සිදු කිරීම නීරෝගී දිවියකට පළමු පියවර වේවි.
දෙවැනි පියවර වන්නේ, එදිනෙදා ඔබට ඇති ‘ඉලක්ක’, එසේත් නැතිනම් ඔබේ බලාපොරොත්තු සහ සිහින කෙසේ විය යුතුදැයි ලියා තැබීමය. ඔබට අමතක වී ගිය, ජීවිතේ ඔබ කළ යුතු දේ ලියා තැපිය යුතුය. සමහරවිට ඔබට ඒවා කර ගන්න අමාරු වෙන්න පුළුවනි. එසේත් නැතිනම් ඒවා විකාර යැයි ඔබට සිතෙන්නටත් පුළුවනි. ඔබ කළ යුතු වන්නේ ඒකාකාර දෛනික ජීවන රටාවෙන් මිදීමය. පවතින ජීවන රටාව අලුත් කර ගැනීම ඔබ කළ යුතුය. සමහරවිට ඔබේ සමහර බලාපොරොත්තු උදා කර ගැනීම මේ ජීවිතයේ දී කර ගැනීමට නොහැකි වේවි.
එසේ වුවත්, ඒවා ලියා තැබීම ඔබ කළ යුතුය. එසේ කළ විට, ඒවා කරා ළඟා වීමට ඔබට ධෛර්යය ලැබෙනු ඇත. ඒ සඳහා ඔබේ සිත පෙළඹෙනු ඇත.
තෙවැනි පියවර වන්නේ, ඔබේ අනාගත සැලැසුම්වලට මඟ පාදා දෙන එක දීර්ගකාලීන ක්‍රියාකාරකමකට අත ගැසීමය. එසේ නොකරන්නේ නම්, ඔබ සැමදා ඒකකාරී වේවි. ඒකාකාරී ජීවන රටාවෙන් මිදී, අලුත් දෙයක් එසේත් නැතිනම් වෙනස් දෙයක් ඔබ කළ යුතුයි. එසේ කටයුතු කළොත්, සතිය අවසන් වෙද්දී ඔබේ ප්‍රධාන අරමුණ කරා ටිකෙන් ටික ඔබ ළං වනු ඇත.
සිවුවැනි පියවර වන්නේ, ආපසු හැරී නොබැලීමය. කිසිවක් ගැන පසුතැවෙන්නේ නැතිව ඔබ කළ යුත්තේ ඉදිරියට යෑමය. අතපසුවීම්, දුක් දොම්නස් ගෙන දෙන සිදුවීම් ගැන පසුතැවෙමින් සිටීමෙන් ඔබ වැළැකිය යුතුය. දුක්මුස් වේදනාකාරී මතකයන් ඇතිනම් ඒවා අමතක කර, සිතට මෙන්ම ගතට ද සහනයක් සතුටක් ගෙනෙන අලුත් මතකයන් ඇති කර ගත යුතුයි. ‘අයියෝ, මං එහෙම නොකර සිටියා නම්’ ‘ඇයි මං එහෙම කළේ’ ආදී ප්‍රශ්න අසන්න යන්න එපා. එවැනි ප්‍රශ්න අසමින් මනසට වද දෙන්න එපා. මඟ හැරුණු සියල්ල අමතක කර, ජීවිතේ අර්ථවත් කර ගත යුතුය. රැකියාව දියුණු කර ගන්නේ කෙසේද ? සැමියාට හොඳ බිරියක, බිරියට හොඳ සැමියකු වන්නේ කෙසේදැයි සිතිය යුතුයි. ඔබ ඔබේ අරමුණු කරා යා යුතුයි. ඊයේ දිනය ඔබට අමිහිරි වුවත් අද හෙට දිනය සොදුරු දිනයක් බවට පත් කර ගැනීම කළ හැක්කේ අන් කිසිවකුට නොව, ඔබටම පමණි.
පස්වැනි පියවර වන්නේ, හේතු ඉදිරිපත් කිරීමෙන් වැළැකීමය. අපට අපේ අරමුණු කරා යෑමේදී බාධා එල්ල වෙයි. එම බාධාවලට හේතු ඉදිරිපත් නොකර බාධක ජය ගැනීම ඔබ කළ යුතුය. එම බාධා ඔබේ ජීවිත ගමනට හේතුවක්, එසේත් නැතිනම් සමාව දිය හැකි කරුණක් නොකර ගත යුතුයි. බාධක එකිනෙක ජය ගනිද්දී, ඔබ තව තවත් ශක්තිමත් වනු ඇත.
නීරෝගී ජීවන රටාවකට අවශ්‍ය වන සය වැනි පියවර වන්නේ, ඔබ කරන කියන හැමදේකම වගකීම ඔබ බාර ගැනීමය. ඔබට සිදුවන දේවල් සම්බන්ධයෙන් වරද වෙන අයට පැටවිය යුතු නැත. වෙන අයට දොස් පැවැරිය යුතු වන්නේ ද නැත. ඔබ සම්බන්ධයෙන් කරන කියන සහ සිදුවන සියලුම දේට වගකිව යුත්තේ ඔබම පමණි. එහෙයින්, දෛනික සැලැස්මකට ඔබ කටයුතු කළ යුතු වෙයි. දිනපතා ව්‍යායාම ගත යුතුය. ඔබේ ජීවිතය ක්‍රිකට් ක්‍රීඩාවක් යැයි සිතන්න, එහිදී ඔබ සිටින්නේ ප්‍රේක්ෂකාගාරයේ හෝ ඔල්වරසන් දෙන්නන් අතරේ හෝ නොවේ. පුහුණුකරු ඔබ නොවේ. ඔබයි පිටිය මැද සිටින පිතිකරු හෝ පන්දු යවන්නා. ඔබ ඔබට ඕනෑ විදියට ක්‍රීඩාව වෙනස් කර ජය ගත යුතුයි. කරන කියන හැමදේකම වගකීම බාර ගනිමින් යන්න ඉදිරියට.
සත්වැනි පියවර වන්නේ, ඔබට ඔබේ අරමුණු කරා යන ගමනේදී එල්ල වන බාධා සහ බාධා කරන්නන් මඟ හැරීමය. එම බාධා තේරුම් ගන්න. බාධා කරන පුද්ගලයන් හඳුනා ගන්න. උදෑසන නීරෝගී ආහාර වේල අමතක කර කඩචෝරු කෑමෙක් වළකින්න. එසේ නොකරන්නැයි ඔබ ඔබටම විධානයක් දෙන්න. නීරෝගී ජීවන රටාවකට අවශ්‍ය විදියට ඔබ ජීවත් විය යුතුයි. ඔබ රේස් අශ්වයකු යැයි සිතන්න. රේස් අශ්වයකුට ඇස් ආවරන පළදවන්නේ අවට කිසි දෙයක් නොපෙනී, ඉදිරිය පමණක් පෙනෙන ලෙසිනි. ඔබත් ඉදිරිය පමණක් බලන්න, ඔබේ අරමුණු කරා යන ගමනේ දී, වටපිට නොබලන්න. එසේ යද්දී ඔබට සුළු සිත් තැවුල් ඇතිවේවි. අපහසුතා ඇතිවේවි. එහෙත් හෙට දවස යහපත් වේවි. ඔබ ඔබටම ස්තුති කර ගනු ඇත.
අට වැනි පියවර නම්, අනාගතය ගැන සිතීමයි. සිතන්න අදින් තව වසර 20 කින් ඔබ කොතැන සිටීවි ද ? කොහොම කෙනෙක් වේවිද ? වසර 20 කින් ඔබ මහල්ලකු වී සිටීවි. අරමුණු කරා ගොස් ඒවා ඉටු කරගත් කෙනෙකු ලෙස ඔබට ඔබ දැකිය හැකිදැයි සිතා බලන්න. ඒ අනුව ඉදිරියට යන්න උත්සහ ගත යුතුය. නව වැනි පියවර වන්නේ, ඔබ ළං කර ගත යුත්තේ ඔබ මෙන් ධනාත්මක දැක්මක් ඇති පුද්ගලයන්ය. ඔබ ස්ථුල පුද්ගලයකු නම්, ඔබ සමීපව ඇසුරු කර ගත යුත්තේ, ඔබට ඔබේ අධි බර අඩු කර ගැනීමට උපදෙස් දෙන සහ සහාය දෙන අවංක පුද්ගලන් පමණි. ‘අයියෝ මොනවා කරත් බර අඩු කර ගන්න බැහැ’ යැයි මැසිවිල නගන මිතුරන් ඇසුරු කිරීමෙන් වැළකිය යුතුය. ධනාත්මක චිත්තනය ඇති ඔබට නිවැරදි උපදෙස් ලබා දෙන මිතුරු මිතුරියන් පමණක් නොව, නෑදෑයින් පවා ඔබ ඇසුරු කළ යුතුය. ඔබේ අරමුණුවලට සමාන අරමුණු ඇති අය ඇසුරු කිරීමෙන් ඔබට ඔබේ අරමුණු වෙත යෑමට ශක්තිය සහ ධෛර්යය වැඩි වැඩියෙන් ලැබෙනු ඇත. එවැනි පුද්ගලයන් ඇසුරු කරන්න, එකිනෙකාට උදවු කර ගන්න.
දස වැනි පියවර වන්නේ, ව්‍යායාමවලට ආදරේ කිරීමය. ව්‍යායාම කිරීම සතුටින් කළ යුතු දෙයකි. එය මනසට හෝ සිරුරට වදයක් හෝ කරදරයක් හෝ නොවිය යුතුය. මානසික සංවර්ධනය ද එසේමය. ව්‍යායාම නොකර සිටීමට හේතු ඇති කර ගත යුතු නැත. උදෑසන හෝ සැවන්දෑවේ ඇවිදීමට ඔබ ප්‍රිය කරන තැනක් තෝරා ගැනීම කළ යුතුය. සුන්දර නැවුම් වාතයෙන් පිරිසරයක් ඒ සඳහා තෝරා ගත යුතුය. එසේ ඇවිදින විටදී, ව්‍යායාම සඳහා ඇවිදිනවා යැයි සිතන්න. වටපිට බලමින් නොයන්න. ඇවිදීම පමණක් නොව, ක්‍රීඩා කරන්න, ඇරොබික්ස් සහ යෝග ව්‍යායාම ද ඔබ නිරෝගීව තැබීමට උපකාරී වෙයි. ඔබ නර්තනයේ යෙදෙන්නකු නම්, ගෙවතු අලංකරණය කරන්නකු නම්, වත්තේ වැඩපල කරන්නකු නම් එය ද ව්‍යායාමයක් වනු ඇත. ව්‍යායාම කිරීමට නොහැකි නම්, පා පැදියක් භාවිතා කරන්න. එවිට ඔබට ව්‍යායාම උපකරණ අවශ්‍ය වන්නේ ද නැත. ඔබට සතුට ගෙන දෙන විදියේ, ක්‍රියාකාරකම් තෝරා ගැනීම ඔබ කළ යුතුවෙයි.
අවසන් වශයෙන්, නීරෝගී ජීවන රටාවකට අවශ්‍ය අමතර කාරණාවක් වන්නේ, ඔබට කළ හැක්කේ දැනට ඔබ කරන ප්‍රමාණය පමණක් යැයි කිසිම විටෙක සිතන්න යන්න එපා. ඔබට කළ හැකි දේ බොහොමයි. ඔබට බැරි දෙයක් නැතැයි යන සිතුවිල්ල සහ අධිෂ්ඨානය පමණක් ඔබට ප්‍රමාණවත් වෙයි. නීරෝගී ජීවන රටාවක් සඳහා ඔබ සකස් කරන මඟ එළිපෙහෙළි කර දීමට එම අධිෂ්ඨානයට හැකි වනු ඇත. ඔබ අවංකවම ඒ ගැන සිතන්න, එවිට ඔබට කරන්න බැරි දෙයක් නැත. ළඟා වීමට බැරි තැනක් නැත
Comments
Post a Comment