''මේ හැමදේම මගේ තාත්තා.

''මේ හැමදේම මගේ තාත්තා. මගේ මාස්ටර් තාත්තා. ලැජ්ජ බය ඇති කළේ අම්මා නම් ඉතුරු සියල්ල තාත්තා. මගේ ඇක්ටර් තාත්තා. ඒ ජීවිතේ මාර ලස්සනයි. අර්ථාන්විතයි. තාත්තා තමයි මගේ හැඩය දුන්නේ. මං පුංචි කාලේදි තාත්තා මාව ළඟට අරගෙන කියනවා 'උඹගේ ඉස්කෝලේ උත්සවයකට උඹට එන්න කිව්වොත් උඹ ගිහින් ඉඳගන්නෙ කොහෙද?' මම ඉතින් සුපුරුදු පරිදි කියනවා 'ඉස්සරහ ම' කියලා. තාත්තා කියනවා 'නෑ, උඹ ගිහින් ඉඳගන්න ඕනෑ පිටිපස්සේ ම පේළියේ පිටිපස්සේ ම අසුනේ' කියලා. 'එතැනින් එහා පුටු තියෙන්න විදිහක් නෑ. මම එහෙම කියන්නේ එතකොට කවුරුත් උඹව නැගිට්ටවන්නේ නෑ. මතක තියාගනින් තැනකට ගියාම කවුරුවත් නැගිට්ටවන්නේ නැති තැනක පුටුවක් තෝරාගන්න.'

මගේ තාත්තා එහෙම කෙනෙක්. මට ජීවිතය කියලා දුන්නේ ඔහු. ඒ මගේ මාස්ටර්. ඔහු ගුරුවරයෙක් නෙමෙයි. ඒත් මගේ ගුරුවරයා. ඒකයි මාස්ටර් කියන්නේ. 'මල් හිටවනවා නම් හැම මල් ගහකටම එක විදිහට වතුර දාපන්. එක විදිහට වතුර දාන්න පුළුවන් විදිහට ඒවා හිටවපං.' එහෙමයි තාත්තා කිව්වේ. 'තරු ගහ ගත්ත කෙනෙක් ගාව කතා කරනවා නම් පරෙස්සම් වෙයන්. මොකද උඹට තරු නෑ. එයාට තරු තියෙනවා. උඹ පරෙස්සම් නොවුණොත් උඹේ තරු විසිවෙයි' කියලා මට තාත්තා කිව්වා. මගේ තාත්තා තමයි මගේ චරිතේ. මගේ වීරයා. මගේ මාස්ටර්. එයා නොහිටින්න අද මම මෙතන නෑ.

තාත්තා නොහිටින්න මට පාර නො පෙන්වන්න මම අද මෙතන නෑ. මගේ මව්පියන් දෙපළට ම ගරු කරනවා. ඒ අය නොහිටින්න. මම එක්කෝ හොඳ පොලු පාරක් කාලා. එක්කෝ පොල්ගහෙන් වැටිලා. එක්කෝ එපා කියපු අත්තක කෙළවරට ම ගිහිල්ලා අත්ත කඩන් වැටිලා. කොටින් ම එහෙම නැත්නම් සෙල්ෆියක් ගන්න ගිහින් කෝච්චියකට හරි අහුවෙලා. ඒ නැතත් අනවශ්‍ය තැනක නටලා. එතැන මඩවෙලා. ඒ මඩගොඩේ වැටිලා. අනෙක්වුන් මාව පාග පාගා නටලා. මම මඩේ එරිලා පොළොව යට.

ඒ කිසිවක් නොවුණේ මගේ මාස්ටර් තාත්තා වුණු හින්දා. මට මේක මෙච්චර කියන්න, මගේ දැනුමේ හැටියට මේ සමාජවල ආණ්ඩුවල වරදක් නෙමෙයි තියෙන්නේ. පවුල්වල වරදක්. පවුලේ අම්මා තාත්තා මාස්ටර්ලා නම් දරුවෝ ඉගෙන ගත්තත් නැතත් හිඟා නොකා කාටවත් කරදරයක් නොවී රටට බරක් නොවී ඉන්නවා. මාස්ටර් දෙපළ අවුල් වුණොත් ඒ ළමයිනුත් අවුල්. හොඳ මාපියන් ගේ ළමයි කොහොමත් හොඳයි. මාපිය දෙපළ තමයි හොඳ වෙන්න ඕනෑ. එතකොට ආණ්ඩුවට ප්‍රශ්න අඩුයි. ඒ පාරේ මමත් ගියා. මගේ දරුවන් ගේ මාස්ටර් මම කියලා මම දන්නවා. මගේ තාත්තා මාස්ටර් වුණු නිසා මට බුදුසරණ නිතරම තිබුණා. මට කවදාවත් වැරදුණේ නෑ. දැන් කොහොමත් වරදින්නේත් නෑ. මේ ප්‍රශ්නයෙන් පිට පැනලා කියවන්නේ, මව්පියෝ හොඳ වෙන්න නම් ඒ අය ළමයින්ගේ මාස්ටර් වෙන්න. ආයේ කිසි අඩුවක් නෑ.''